Авыл 4 гыйнвар 2021 06:25

Арча районы инженеры умартачылыкны үстерүгә грант алды

Грант «Кече һәм урта эшмәкәрлек һәм шәхси эшмәкәрлек инициативасына ярдәм» илкүләм проекты буенча бүленгән.

Скопировать ссылку

(Казан, 4 гыйнвар, «Татар-информ»). Арча районында яшь умартачы Айдар Исламов «Кече һәм урта эшмәкәрлек һәм шәхси эшмәкәрлеккә ярдәм» илкүләм проекты, «Агростартап» федераль программасы буенча Татарстан Авыл хуҗалыгы һәм азык-төлек министрлыгы грантын отты. Бу хакта Татарстан Авыл хуҗалыгы һәм азык-төлек министрлыгы матбугат хезмәте хәбәр итә.

Казанбаш авылында туып-үскән Айдар Исламов Казан аграр университетының механизация факультетын тәмамлаганнан соң 9 ел Арча районының иң эре авыл хуҗалыгы предприятиесендә — «Ак барс» агрокомплексы» ҖЧҖендә баш инженер булып эшләгән, аннары умартачы булды.

«Узган ел без энем Нияз белән 10 оядан умарта үрчетергә булдык. Ел уңышлы чыкты, һәм без шунда ук чирек тонна бал алдык. Безгә ошады. Һәм ул көтелмәгән бизнесны киңәйтергә һәм „Агростартап“ программасы буенча грант алуга Татарстан Авыл хуҗалыгы һәм азык-төлек министрлыгы конкурсында бәхетне сынап карарга тәкъдим итте», — дип сөйләде Айдар Исламов.

Документларны ничек әзерләргә икәнлеген Татарстан Фермерлар һәм крестьян хуҗалыклары ассоциациясендә аңлатканнар. Ә проектны яклаганнан соң бер айдан соң аларның 2,5 млн сум грант отуы билгеле булды.

Айдар Исламов эштән киткән һәм фермерлыкка игътибарын юнәлткән. Хәзер аның хуҗалыгында йөздән артык төрле төстәге умарта оялары, ике вагон, көнкүреш бинасы бар.

Сәхифәләр

Арча районы инженеры умартачылыкны үстерүгә грант алды