Татарстанда терлек азыгы җыю комбайннарын ремонтлау эшләре тәмамланып килә

Балтач, Бөгелмә, Саба һәм Теләче районнарында терлек азыгы җыю комбайннары тулысынча төзекләндерелгән
(Казан, 3 июнь, “Татар–информ”, Ирина Игнатьева). Татарстанда терлек азыгы җыю комбайннарын ремонтлау эшләре тәмамланып килә. Балтач, Бөгелмә, Саба һәм Теләче районнарында терлек азыгы җыю комбайннары тулысынча төзекләндерелгән. Бу хакта “Татар–информ” агентлыгына ТР Авыл хуҗалыгы һәм азык–төлек министрлыгыннан хәбәр иттеләр.
Республика хуҗалыкларында 1415 терлек азыгы җыю комбайны исәпләнә. Бүгенге көндә аларның әзерлеге 88 процент тәшкил итә. Республиканың кайбер районнары комбайннарны ремонтлау эшләрен тулысынча төгәлләде. Бу атнада Әтнә һәм Минзәлә районнарында терлек азыгы җыю техникасының әзерлеге тикшереләчәк.
Автомашина, пресс–җыйгыч, трактор чапкычы кебек терлек азыгы җыю техникасын ремонтлау эшләре дә ахырына якынлаша. Республикада терлек азыгы әзерләүгә июнь урталарында керешергә ниятлиләр.