«Адымнар — Алабуга» мәктәбе белгече «Иң яхшы татар теле укытучысы» дип танылды
«Адымнар — Алабуга» татар теле һәм әдәбияты укытучысы Надежда Семенова «Һөнәргә тугрылыгы өчен» номинациясендә җиңүче булып танылды. Бу хакта «Алабуга нуры» яза.
Татар теле укытучыларын үзләренә генә хас булган бер сөйкемлелек, ягымлы караш, балаларга җылы мөнәсәбәт һәм туган телгә зур мәхәббәт аерып тора. Бүгенге көндә ул «Адымнар — Алабуга» күп телле белем бирү комплексында татар теле һәм әдәбияты фәннәрен алып бара. Укучыларга телне генә өйрәтеп калмыйча, тәрбияви компонентка да зур игътибар бирә.
Надежда Семенова Мамадыш районы Чиябаш авылында туа. Авыл мәктәбен тәмамлап, Минзәлә педагогик көллиятендә башлангыч сыйныф һәм татар теле укытучысы һөнәрен үзләштерә. Анда укуны уңышлы тәмамлагач, көллиятнең бер укытучысы «Әйдә, Алабугага бар, анда югары белем алырга мөмкинлек бар» дип, аны Алабугага җибәрә. Укырга кереп, Алабуганың 2нче мәктәбендә ул татар теле һәм әдәбияты укытучысы булып эшли башлый.