Әдәпле мода KazanForum подиумында төрле илләрдән дизайнерларны берләштерәчәк
«Россия – Ислам дөньясы: KazanForum» XVI халыкара икътисади форумы кысаларында 14 майда Казанда әдәпле мода дөньясында мөһим вакыйга – Мodest Fashion Day була. Бу хакта форумның матбугат хезмәтендә хәбәр иттеләр.
18.30 сәгатьтә «Корстон» мәйданчыгында тамашачылар Россия һәм чит илләрдән килгән алдынгы дизайнерларның тыйнаклык, мәдәни тәңгәллек һәм актуаль мода трендлары синтезын чагылдырган коллекцияләрен күрәчәк.
Быел жанр чикләрен киңәйтүгә аерым игътибар бирелә: подиумда хатын-кыз образлары гына түгел, ә тыйнаклыкның актуаль стиль белән ничек ярашуын күрсәтүче ир-ат образлары да пәйда булачак.
Брендлар һәм мода күрсәтүче илләр: Умед Кучкалиев – Таҗикстан, MIN_ZIFA – Россия, Уфа, MARGA – Россия, Владивосток, Aadima – Катар, Danjyo Hiyoji – Индонезия, Atiya Khan – Пакистан, SHEHNA HUSSAIN – Берләшкән Гарәп Әмирлекләре һәм Amal Al Raisi – Оман.
Modest fashion - ул кием генә түгел, ә дөньяга караш, гармония һәм мәдәни традицияләрдә хөрмәт чагылышы. Әдәпле кием стиленә елдан-ел ихтыяҗ арта һәм мәдәниятләр, илләр һәм буыннар арасында күпер булып хезмәт итә.
Чара әдәпле мода юнәлешендә эшләүче дизайнерларга ярдәм итү өчен әһәмиятле мәйданчык, шулай ук халыкара элемтәләрне җайга салу һәм модельерларның креатив потенциалын тәкъдим итү мөмкинлеге булачак.
Modest Fashion Day 2025 заманча һәм традицияләрне, фольклорны һәм инновацияләрне берләштерәчәк, мәдәни диалог өчен киңлек буларак подиум булдырачак. Мода аша тамашачыларга, чыганаклар һәм тирән кыйммәтләр турында онытмыйча, киләчәккә карарга тәкъдим итәчәкләр.
Чарага «Россия – Ислам дөньясы: KazanForum» XVI халыкара икътисади форумында катнашучылар өчен чакыру буенча керү мөмкин була.
Искәртик, KazanForum буларак билгеле «Россия – Ислам дөньясы» халыкара икътисади форумы – Россия һәм ислам дөньясы илләре арасында икътисади, инвестицион һәм мәдәни хезмәттәшлекне ныгыту өчен зур халыкара мәйданчык. Ел саен форум Казанда партнерлык мөнәсәбәтләрен ныгыту белән кызыксынган меңләгән катнашучыларны – дәүләт эшлеклеләрен, бизнесменнарны, экспертларны һәм дипломатларны җыя.
«Россия – ислам дөньясы: KazanForum» XVI халыкара икътисади форумы 13-18 май көннәрендә Казанда уза. 2025 елда форумның төп темасы – «Цифрлаштыру: яңа чынбарлык һәм хезмәттәшлекне киңәйтү өчен өстәмә мөмкинлекләр». Дөньяның 87 иленнән вәкилләр катнашуларын раслады.