Татар әдәбияты 15 май 2023 00:01

Абдулла Алиш. Сагынам илемне

Скопировать ссылку

Сагынам илемне, нечкә билемне,
Яшь вакыт йөзгән зәңгәр күлемне.

Сагынам җәйләрен, матур айларын,
Майлы коймаклы Сабантуйларын.

Сагынам урманын, чишмә буйларын,
Таң аткан чакта кошлар җырлавын.

Сагынам кич-иртә, онытмыйм һич тә,
Чөнки мин сөям, әйтмимен тиккә.

Нигә бу кадәр сөям илемне? –
Җырына күмеп тирбәтте мине.

Үстерде илем батыр ир итеп,
Очырды яуга җитез җил итеп.

Барырмын таптап дошман тупларын,
Куркып чигенмәм зәһәр утлардан…
(1942)

Абдулла Алиш. Скучаю по Родине (Перевод Равиля Бухараева)

Скучаю по Родине, отчему краю,
по рощам зелёным,
по синим озёрам,
по ивам плакучим,
по нивам скучаю...
Подолгу на небо
задумчивым взором
гляжу,
вспоминая далёкое детство,
луга и поляны,
и шум Сабантуя.
Скучаю по чащам
бескрайнего леса,
где в детстве искал
родников чистоту я.
За свет родников,
за лужайки опушек,
за счастье Отчизны, за правое дело
я смело пойду
против танков и пушек,
чтоб знамя победы
над миром алело!
(1942)

Белешмә. Абдулла Алиш (Габдуллаҗан Габделбари улы Алишев) (1908-1944) – тумышы белән Татарстанның бүгенге Спас районы Көек авылыннан. Мәктәп елларыннан әдәбият-сәнгать белән кызыксына, шигырьләр, хикәяләр яза. Казанда җир төзелеше техникумында укыганда көндәлек матбугатта мәкаләләре дөнья күрә башлый. 1941-1945 еллардагы Бөек Ватан сугышына кадәр җир төзелеше белән бәйле оешмаларда техник вазифалар башкара, «Техника» журналында, «Пионер каләм» (хәзерге «Ялкын») журналында, Татарстан радиокомитетында эшли. Балалар өчен әдәби түгәрәкләр белән җитәкчелек итә. Иҗат белән актив шөгыльләнә, шул исәптән балалар өчен хикәяләр, әкият-хикәятләр, пьесалар, шигырьләр яза. 1941 елның июлендә армиягә алына һәм фронтка озатыла, шул ук елны чолганышта калып, немецларга әсир төшә. Әсирлектә антифашистик яшерен оешмага кушыла. 1943 елның августында яшерен оешманың эше ачыла. Нәтиҗәдә, әсирлектә фашизмга каршы көрәш алып барган унбер каһарман (шул исәптән Муса Җәлил, Гайнан Кормаш, Абдулла Алиш һ.б.), фашистик хәрби суд карары белән, 1944 елның 25 августында җәзалап үтерелә. Абдулла Алишның әсирлек елларында язган кайбер шигырьләре соңрак туган илгә кайтып җитә.

#Абдулла Алиш шигырьләре #Абдулла Алиш

Сәхифәләр

Абдулла Алиш. Сагынам илемне