Татар әдәбияты 15 май 2023 00:26

Абдулла Алиш. Ана уйлары

Скопировать ссылку

Төн караңгы. Һичбер тавыш килми,
Җил дә исүеннән туктаган.
Яшь бала да тынган елавыннан,
Рәхәтләнеп, күптән йоклаган.

Киң кырлар да, куе урманнар да
Тын йокыга инде батканнар.
Урманнарда булган җәнлекләр дә
Ял итәргә күптән ятканнар.

Тик йокламый караңгыда ялгыз
Тирән уйга баткан яшь ана.
Ул ваз кичкән бөтен дөньясыннан,
Күзләреннән аның яшь тама.

Нәни улын кысып күкрәгенә,
Тирән сулап, нидер уйлана.
Кичә генә үткән яшьлек гомерен
Һәм югалган дустын сагына.

Абдулла Алиш. Материнские раздумья (Перевод Наиля Ишмухаметова)

Ночь темна. Ни малейшего звука,
Даже ветер притих за окошком.
Спит ребёнок, ему снится в люльке
Ягод полное с горкой лукошко.

И поля, и дремучие чащи
До утра сном глубоким забылись,
И вся живность семейкою спящей
По расщелинам-норам забилась.

Одинокая мать молодая
Не смыкает ресниц, не до сна ей,
Думы тяжкие одолевают,
Отрешённо лежит и не знает,

Как ей быть, как ей жить, одинокой...
Нарушает покой вздох глубокий,
Каплют слёзы тоски на подушку,
Берегут материнскую душу.

Белешмә. Абдулла Алиш (Габдуллаҗан Габделбари улы Алишев) (1908-1944) – тумышы белән Татарстанның бүгенге Спас районы Көек авылыннан. Мәктәп елларыннан әдәбият-сәнгать белән кызыксына, шигырьләр, хикәяләр яза. Казанда җир төзелеше техникумында укыганда көндәлек матбугатта мәкаләләре дөнья күрә башлый. 1941-1945 еллардагы Бөек Ватан сугышына кадәр җир төзелеше белән бәйле оешмаларда техник вазифалар башкара, «Техника» журналында, «Пионер каләм» (хәзерге «Ялкын») журналында, Татарстан радиокомитетында эшли. Балалар өчен әдәби түгәрәкләр белән җитәкчелек итә. Иҗат белән актив шөгыльләнә, шул исәптән балалар өчен хикәяләр, әкият-хикәятләр, пьесалар, шигырьләр яза. 1941 елның июлендә армиягә алына һәм фронтка озатыла, шул ук елны чолганышта калып, немецларга әсир төшә. Әсирлектә антифашистик яшерен оешмага кушыла. 1943 елның августында яшерен оешманың эше ачыла. Нәтиҗәдә, әсирлектә фашизмга каршы көрәш алып барган унбер каһарман (шул исәптән Муса Җәлил, Гайнан Кормаш, Абдулла Алиш һ.б.), фашистик хәрби суд карары белән, 1944 елның 25 августында җәзалап үтерелә. Абдулла Алишның әсирлек елларында язган кайбер шигырьләре соңрак туган илгә кайтып җитә.

#Абдулла Алиш шигырьләре #Абдулла Алиш

Сәхифәләр

Абдулла Алиш. Ана уйлары