Абдулганиев: Гражданнарның суд хакимияте белән танышуы җәмәгать юстициясеннән башлана

Халыклар бердәмлеге көне һәм Татарстан Республикасы Конституциясе көне алдыннан Дәүләт Советында республиканың төрле районнарындагы суд участокларын тәкъдим итүче җәмәгать судьяларына таныклыклар тапшыру тантанасы булды. Җәмәгать судьясының хезмәт таныклыкларын Татарстан Дәүләт Советы Рәисе Фәрид Абдулганиев тапшырды. Бу хакта ТР Дәүләт Советы матбугат хезмәте хәбәр итә.

Тантананы ачып, парламент башлыгы җәмәгать судьяларын билгеләү вәкаләте Төп закон белән Дәүләт Советы карамагына бирелүен билгеләп үтте. «Хәзерге вакытта Татарстанда 190 суд участогында җәмәгать судьялары тарафыннан йөзләрчә мең җинаять, гражданлык һәм административ эшләр карала. Бу сизелерлек йөкләнеш, шул ук вакытта гражданнарның суд системасына ышанычы зур булуын күрсәтә», – диде Фәрид Абдулганиев, җәмәгать судьяларына мөрәҗәгать итеп.

Узган ел республиканың җәмәгать юстициясе үзенең 25 еллыгын билгеләп үтте. 2025 елның октябрендә «Җәмәгать судьялары турында» база законы яңартылды, бу Татарстан Республикасы судьялар советы белән үзара хезмәттәшлек урнаштырырга мөмкинлек бирде. Дәүләт Советы Рәисе әйтүенчә, республикада җәмәгать судьялары эшчәнлегенә зур оештыру һәм матди-техник ярдәм күрсәтелә – тармак цифрлаштырыла, судьялар һәм аппарат хезмәткәрләренең квалификациясен күтәрү оештырыла, биналарга капиталь ремонт ясала. Ел саен бу максатларга республика бюджетыннан якынча 1 млрд. сум бүлеп бирелә.

Быел Татарстан Республикасы Рәисе Рөстәм Миңнеханов карары белән суд участокларын капиталь ремонтлауны финанслау 50 млн сумнан 260 млн сумга кадәр арттырылган. «Гражданнарның илнең суд хакимияте белән танышуы җәмәгать юстициясеннән башлана. Төрле бәхәсләрне җайга салу, шулай ук еш кына кешеләрнең язмышы сез чыгарган карарларга бәйле. Шуңа күрә әхлакый яктан да, законлылык ягыннан да сезгә югары таләпләр куела. Сезгә хезмәт таныклыгы тапшырып, законга хезмәт итүдә, гражданнарның хокукларын һәм мәнфәгатьләрен яклауда, дәүләтебезне һәм җәмгыятебезне ныгытуда уңышлар телим», – дип басым ясады Фәрид Абдулганиев.

Татарстан Республикасы Югары Суды рәисе Азат Гыйльметдинов, әлеге мөһим вакыйга белән коллегаларын котлап, суд системасында җәмәгать судьяларының ролен һәм һәр кабул ителгән карарның мөһимлеген билгеләп үтте.

«Таныклыклар тапшыру – сезнең өчен генә түгел, ә безнең төбәкнең бөтен суд системасы өчен дә әһәмиятле вакыйга. Судья булу – гади һөнәр түгел, ә зур җаваплылык белән бәйле югары бурыч. Сезнең хезмәтегез тирән һөнәри белем, кешелеклелек, сабырлык һәм тормыш зирәклеген таләп итә. Җәмәгать судьялары гражданнарның гаделлеккә ышанычын ныгытуда төп роль уйныйлар. Нәкъ менә сезгә төрле катлаулы тормыш ситуацияләре буенча килгән кешеләр мөрәҗәгать итә, һәм сезнең карарларга конкрет эшнең нәтиҗәсе генә түгел, ә кешеләрнең гаделлеккә һәм законга ышанычы да бәйле булачак», – диде Азат Гыйльметдинов.

Җәмәгать судьяларына ТР юстиция министры вазифаларын башкаручы Илья Гомзик та мөрәҗәгать итте. «Тантананың Дәүләт Советында узуы символик мәгънәгә ия, чөнки нәкъ менә республиканың закон чыгару хакимияте Татарстанның җәмәгать юстициясе институтына нигез салды. Җәмәгать юстициясе – кешегә иң якын булган суд системасы. Кешенең дәүләтне һәм законны ничек кабул итүе сезнең һәнәри осталыкка һәм гаделлеккә бәйле», – дип ассызыклады Илья Гомзик.