21 июньдә Ульяновск өлкәсендә Бөтенроссия «Татар азаны» конкурсының финалы үтәчәк
21 июньдә Ульяновск өлкәсендә Бөтенроссия «Татар азаны» конкурсының финалы үтәчәк. Илебез күләмендәге әлеге чара Иске Майна районында урнашкан «Болгар заставасы» тарихи-мәдәни комплексында узар дип көтелә. Сайлап алу турына видеоязмалар 7 июньгә кадәр кабул ителде, дип хәбәр итә «Өмет» газетасы.
Конкурс татар милли көенә хас азан әйтү традицияләрен саклап калу, мөәзиннәрнең осталыгын арттыру һәм яшь буынны милли-дини рухта тәрбияләү максатында оештырыла.
Конкурста 15 яшьтән өлкәнрәк ир-атлар катнаша ала. 15-17 яшьлекләр өчен аерым номинация каралган. Азан татарның милли аһәңе буенча башкарылырга тиеш.
Проект Ульяновск өлкәсе губернаторы, Бөтендөнья татар конгрессы, «Рухи моң» иҗат берләшмәсе һәм «Сембер» бизнес-клубы ярдәмендә гамәлгә ашырыла.