Быел мәктәпләрдә соңгы кыңгырау 26 майда узачак
Россия мәктәпләрендә соңгы кыңгыраулар быел 26 майда узачак, дип Мәгариф министрлыгы матбугат хезмәтендә хәбәр ителә. Бу хакта РИА Новости яза.
«Россия мәктәпләрендә соңгы кыңгыраулар 26 майда узарга тиеш. Тиешле тәкъдимнәрне РФ Мәгариф министрлыгы илнең барлык төбәкләренә җибәрде», - диелә хәбәрдә.
Мәктәпләрдә чыгарылыш имтиханнары 1 июньнән дә иртәрәк башланмый.
Соңгы кыңгыраулар программасына Россия Федерациясе флагын күтәрү һәм гимнын башкару тантаналарын, шулай ук күп балалы гаиләләрне хөрмәтләүне, махсус хәрби операцияда катнашучы ата-аналарның һәм дәүләт бүләкләренә лаек булганнарның чыгышларын кертергә тәкъдим ителде.
Регионнарга тантаналы чараларга әзерлек вакытында куркынычсызлык чараларын тәэмин итәргә һәм мөмкинлекләре чикләнгән мәктәп укучылары өчен уңайлы мохит булдырырга куштылар.