2020 елда Татарстанда ату коралын югалтучы кешеләр саны кимегән
Росгвардиянең Татарстан буенча идарәсе белешмәсе буенча, коралны ышанычлы урында сакларга кирәк, югалткан очракта аны җинаятьчеләр кулланырга мөмкин.
(Казан, 23 декабрь, «Татар-информ», Елена Саляхова). 2020 елда Татарстанда яшәүчеләр арасында ату корал югалтучылар саны кимегән. Узган елда корал югалтуның 27, ә быел 17 очрагы теркәлгән. Бу хакта Татарстан буенча Росгвардия идарәсендә узган брифингта Казан буенча Росгвардия идарәсенең лицензия-рөхсәт бирү эшләре бүлеге җитәкчесе Ранис Миңнуллин әйтте.
«Бүген Татарстанда 45 мең чамасы кешенең коралы бар. 2020 елда 30 меңнән артык тикшерү уздырылды, хезмәткәрләр коралның кайда һәм ничек саклануын тикшерде», — дип сөйләде Ранис Миңнуллин.
Моннан тыш, рейдлар барышында Росгвардия хезмәткәрләре кешенең коралга тиешле документлары, шул исәптән аңа рөхсәте булу-булмавын да тикшерде.
«Корал хуҗаның яшәгән урынында гына сакланырга тиеш. Өйдә һичшиксез коралны саклау өчен урын булдырырга кирәк, ул балалар ала алмаслык урында, мәсәлән, сейфта сакланырга тиеш. Ә патроннарны коралдан аерым сакларга кирәк», — диде Миңнуллин.
Корал саклау кагыйдәләрен бозган кешеләргә штраф салына.
Ведомство вәкилләре Татарстан халкына Яңа ел бәйрәмнәре алдыннан уяу булырга — коралны ышанычлы урында сакларга, урамда йөргәндә, бигрәк тә исерек булганда аны үзең белән алмаска өнди. Коралны югалткан очракта, аны җинаятьчеләр кулланырга мөмкин.