Икътисад 20 апрель 2005 15:54

2006-2010 елларга Татарстанда энергия-ресурслар саклауның яңа программасы 1 сентябрьгә тәкъдим ителәчәк

Скопировать ссылку

(Казан, 20 апрель, “Татар-информ”, Тимур Циунчук). 2000-2005 елларга республика энергия саклау программасының дәвамы 2006-2010 елларга Татарстанда энергия-ресурслар саклау программасы булачак. Бу хакта бүген “Татмедиа” агентлыгында матбугат конференциясендә ТР Министрлар Кабинеты каршындагы энергия саклау үзәге директоры урынбасары Владимир Пузанкин белдерде.

Агымдагы елда тәмамланачак биш еллык программаның төп нәтиҗәсе Татарстанда продукция җитештергәндә энергия сарыф итүне киметү булды. 2004 елда электр энергиясе, алдагы ел белән чагыштырганда, 1,5 процентка күбрәк сатылган. Россия буенча электр һәм җылылык энергиясен җитештерүнең иң яхшы техник-икътисади күрсәткечләренә ирешелгән. 1 кВт-сәгать энергиягә шартлы ягулыкның чагыштырма чыгымы - 330,1 грамм, 1 Гкал җылылыкка 133,9 килограмм тәшкил иткән.

Программаны гамәлләштерүне киң яктырту зарурлыгы турында әйтеп, Владимир Пузанкин республиканың күп кенә районнары һәм шәһәрләренең энергетик нәтиҗәлелекне арттыру мәсьәләсендә күрсәтерлек казанышлары булуын билгеләп үтте. Чаллы, Әлмәт, Түбән Кама, Бөгелмә, Азнакай һәм Буада зур уңышларга ирешкәннәр. В.Пузанкин журналистларга гаммәви мәгълүмат чараларында энергия саклау стратегиясен яктыртуның мөһимлеге турында белдерде.

Сәхифәләр

2006-2010 елларга Татарстанда энергия-ресурслар саклауның яңа программасы 1 сентябрьгә тәкъдим ителәчәк