Җәмгыять 24 август 2016 10:54

2 мең ришвәт тәкъдим иткән казанлы 60 мең сум штраф түләячәк

Ир-ат исерек килеш автомобиль белән идарә итүдә тотылгач, ЮХИДИ хезмәткәренә ришвәт биреп котылмакчы була

Скопировать ссылку

(Казан, 24 август, «Татар-информ»). Югары Ослан прокуратурасы Казанда яшәүче 59 яшьлек Фәнил Зәкиевка карата җинаять эше буенча дәүләт гаепләвен хуплады. Казанлы РФ Җинаять кодексының 30 маддәсенең 3 бүлегендә, 291 маддәсенең 3 бүлегендә каралган җинаять җаваплылыгына (ришвәт бирүгә омтылу) тартыла.

Зәкиев июнь аенда исерек килеш руль артына утыра. Югары Ослан авылы янында машина йөртүчене ЮХИДИ хезмәткәре туктата һәм ул аның нинди хәлдә булуын күрә. Административ җаваплылыктан котылу максатыннан Зәкиев патруль автомобилендә автоинспекторга 2 мең сум ришвәт бирә һәм беркетмә тутырмавын сорый.

Зәкиев судта үз гаебен тулысынча таный. Суд аңа 60 мең сум күләмендә штраф түләү карарын чыгарган.

(Надия Шәйхетдинова әзерләде).

#штраф #ЮХИДИ

Сәхифәләр

2 мең ришвәт тәкъдим иткән казанлы 60 мең сум штраф түләячәк