16 декабрьдә Казанның Кремль яр буенда әкият шәһәрчеге ачыла
18.00 сәгатьтә биредә чыршы утлары кабыначак һәм бәйрәм салютын күзәтергә мөмкин булачак.
(Казан, 14 декабрь, «Татар-информ»). 16 декабрьдә Казанның Кремль яр буенда әкият шәһәрчеге ачыла. 18.00 сәгатьтә биредә чыршы утлары кабыначак һәм бәйрәм салютын күзәтергә мөмкин булачак.
Быел әкият шәһәрчегендә кунакларны күп кенә кызыклы әйберләр көтә. Кыш бабай йорты һәм остаханә янында эльфлар авылы «үсеп чыккан». Эльфлар мәктәбендә теләгән һәркемне эльфлар осталыгына өйрәтәчәкләр һәм тиешле документ тапшырачаклар.
Шәһәрчектә урнашкан кинотеатрда бәйрәм көннәрендә Яңа ел мультфильмнары күрсәтәчәкләр. Кремль яр буена инде икенче ел рәттән төньяк боланнары да «кунакка» килә.
Биредә урнаштырылган төп сәхнәдә эльфлар казанлылар һәм шәһәр кунакларына төрледән-төрле Яңа ел спектакльләре күрсәтәчәк. Әкият шәһәрчеге кунакларны 28 гыйнварга кадәр кабул итәчәк, дип хәбәр иттеләр Кремль яр буеның маркетинг бүлегеннән.