14 сентябрьдә Казан мәктәпләрендә көзге «Игелек атнасы» башлана

14 сентябрьдән 20сенә кадәр Казан мәктәпләрендә көзге «Игелек атнасы» уздырыла. Мәктәп укучылары өчен волонтерлыкка, гражданлык җаваплылыгына, экологик үзаң, әйләнә-тирәгә карата сакчыл мөнәсәбәт булдыруга багышланган чаралар әзерләнә. Бу хакта Казан мэриясе матбугат хезмәте хәбәр итә.

Программа 14 сентябрьдә «Тынычлык көне»ннән башланып китә. Мәктәпләрдә гражданлык-патриотик темасына кагылышлы чаралар, илкүләм акцияләр һәм «Мөһим нәрсәләр турында сөйләшү» дәресләре үткәрелә. Россия халыкларының бердәмлеге елы, Хәрби һәм хезмәт батырлыгы елы темалары буенча фикер алышуга аерым игътибар бирелә.

15 сентябрьдә «Дүрт аяклы тугры дусларга ярдәм итү көне» уздырыла. Укучыларга хайваннарга карата сакчыл мөнәсәбәт булдыру, аларны карау кагыйдәләре, хайваннарны яклау оешмалары эшчәнлеге турында сөйләячәкләр. Балалар приютларга бара, әлеге теманы чагылдыра торган брошюралар, плакатлар әзерли ала. Бу көнне шулай ук «Без кулга ияләштерелгәннәр өчен җаваплы» программасы тәкъдим ителә.

16 сентябрьдә «Бердәмлек һәм тынычлык көне» кысаларында укучыларны инвалид, сәламәтлеге чикле балалар һәм төрле мәдәният әһелләре белән очрашулар, интерактив чаралар көтә. Программага илебез халкының гореф-гадәтләре, көнкүреше һәм көндәлек тәҗрибәләре белән таныштыра торган «равный равному/син дә миңа тиң, мин дә сиңа тиң» әңгәмәләре, кече интервью һәм «җанлы китапханәләр» кертелгән. Шулай ук инклюзив спорт һәм интеллектуаль турнирлар оештырырга, әлеге теманы яктырта торган кинолар күрсәтергә, хөрмәт, үзара аңлашу һәм аралашу культурасы темалары буенча фикер алышу чаралары үткәрергә җыеналар.

17 сентябрьгә «Игелекле гамәлләр көне» билгеләнгән. Мәктәпләрдә өлкәннәргә, инвалидларга һәм авыр тормыш хәлендә калганнарга ярдәм итү өчен волонтерлык командалары оештырыла. Моннан тыш, укучыларга хәйрия концертлары һәм иҗади акцияләр оештыру мөмкинлеге бирелә. Алар җыелган акчаларны социаль проектларга юнәлтә ала.

18 сентябрьдә укучылар экология белән бәйле «Яшел эшләр исемлеге» чарасында катнашачак. Аларга экология дәресләре, калдыклар җыю акцияләре, әйләнә-тирә мохитне саклау проектлары бәйгесе әзерләнә. Шул ук көнне экологик төркемнәр оештырыла.

«Игелек атнасы» программасын 19 һәм 20 сентябрьдә уздырылачак хәйрия ярминкәләре, фестивальләр тәмамлый. Катнашучылар ярминкә өчен кул эшләнмәләре: бизәнү әйберләре, керамика, кечерәк картиналар, фотосурәтләр, бәйләнгән кием-салым һәм башка иҗади эшләр тәкъдим итә ала. Сәламәт туклану мәдәниятенә игътибарны җәлеп итү өчен ярминкәләргә өстәмә рәвештә файдалы ризыклар алып килергә була. Җыелган акчалар балалар йортларына, каты авыручыларны дәвалауга, мохтаҗ балаларга, шулай ук башка социаль тәкъдимнәргә, шул исәптән хайваннарга ярдәм итүгә юнәлдерелә.