11 яшьлек татарстанлы Грозный шәһәрендә Коръән-хафизлар конкурсында катнашты
Коръәнне яхшы белүче гамәлен Татарстан мөфтие Камил хәзрәт Сәмигуллин хуплады.
(Казан, 22 август, «Татар-информ»). Бүген Грозный шәһәрендә халыкара Коръән укучылар конкурсында Татарстаннан 11 яшьлек Әхмәд Шахмәмәдов чыгыш ясады. Бу хакта Татарстан мөселманнары Диния нәзарәте матбугат хезмәте хәбәр итә.
Малай туганнан бирле әти-әнисе белән Мәккәдә яши һәм гаилә традицияләрен дәвам итә – ул Рәшидә абыстай Исхакованың оныкчыгы. Әхмәд татар, рус һәм гарәп телләрен камил белә. Ул ун яшь ярым булганда Коръәнне тулысынча өйрәнеп бетергән.
Быел яшүсмер Казанның Галиев мәчетендә Татарстан Президенты Рөстәм Миңнеханов катнашында узган Корбан бәйрәмендә Коръән укып танылган.
Татарстанлы бүген 25 төбәкне тәкъдим иткән конкурсантларның соңгысы булып чыгыш ясады. «Конкурс нәтиҗәләре һәм җиңүчеләре иртәгә билгеле булачак», - диелгән хәбәрдә.
Малайга әти-әнисе генә түгел, ә Грозныйга эш сәфәре белән килгән Татарстан мөфтие Камил хәзрәт Сәмигуллин да ярдәм итә.