Икътисад 23 гыйнвар 2023 17:44

Хезмәт министрлыгы 2023 елда Татарстан буенча уртача хезмәт хакының артуын фаразлады

Скопировать ссылку

Ел башында Татарстан буенча уртача хезмәт хакы 50,2 мең сум тәшкил итә, ул бер ел эчендә 17 процентка арткан. Ел дәвамында бу сан тагын да артырга мөмкин. Бу турыда «Татар-информ»га Татарстан Республикасының хезмәт, халыкны эш белән тәэмин итү һәм социаль яклау министры урынбасары Клара Таҗетдинова хәбәр итте.

«Быел без шулай ук хезмәт хакының артуын көтәбез. Россия Федерациясе дәрәҗәсендә хезмәткә түләүнең минималь күләмен аена 16,2 мең сумга кадәр арттыру турында карар кабул ителде. Ел саен субъектлар дәрәҗәсендә Профсоюзлар федерациясе, Сәүдә-сәнәгать палатасы һәм Хөкүмәт арасында төзелә торган килешү кысаларында республикада бюджеттан тыш секторда минималь хезмәт хакы 19 мең сумнан артык булачагы турында карар кабул ителде», – диде ул.

Ул билгеләп үткәнчә, ел башында Татарстан Хезмәт министрлыгы эшсезлек күрсәткеченең рекордлы түбән дәрәҗәдә булуын теркәгән. Киләчәктә кадрлар өчен конкуренция арта гына барачак.

«Эшсез кешеләр күп түгел, ә эшче көчкә ихтыяҗ кимеми. Хәзер бер эшсезгә шартлы рәвештә алты вакансия туры килә. Эш бирүчеләр кадрларны җәлеп итү өчен тырышлык куя – хезмәт хакын арттыра яки арендага торак бирү , социаль пакетлар, медицина хезмәте күрсәтү рәвешендәге өстәмә социаль гарантияләр тәкъдим итә», – диде Таҗетдинова.

Сәхифәләр

Хезмәт министрлыгы 2023 елда Татарстан буенча уртача хезмәт хакының артуын фаразлады