Татарстаннан махсус хәрби операциядә катнашучы Фердинанд Гыйләҗетдинов бүләкләнде
Актаныш районының Яңа Җияш авылында туып-үскән мотоукчылар полкының кече сержанты Фердинанд Гыйләҗетдинов «Хезмәттәге казанышлар өчен» медале белән бүләкләнде. Дәүләт бүләге махсус хәрби операция зонасында хәрби бурычларны үтәгәндә күрсәткән батырлык һәм фидакарьлек өчен бирелде.
Элегрәк, 2024 елның сентябрендә, Гыйләҗетдинов «Батырлык өчен» медале белән бүләкләнгән иде.
Фердинанд Гыйләҗетдинов үз гаиләсенең хәрби традицияләрен дәвам итә. Бөек Ватан сугышы елларында аның бабасы Галим Гыйләҗетдинов та «Батырлык өчен» медале белән бүләкләнә.
Хакимият һәм район халкы хәрби хезмәткәрне бүләкләре белән котлый һәм хезмәте өчен рәхмәт белдерә.
Элегрәк Татарстан Рәисе Рөстәм Миңнеханов Мәскәү Кремлендә Россия Президенты Владимир Путин белән очрашуда республикадан махсус хәрби операциягә, мобилизацияләнүчеләр һәм контрактникларны да кертеп, 38 169 кеше китүе турында сөйләгән иде. «Бездә 15 Россия Герое бар, шуларның җидесе бу исемгә үлгәннән соң лаек булды. Республикадан 1829 хәрби хезмәткәр Батырлык ордены белән бүләкләнде», – диде ул.
Фотоны Ләйсән Газизова тәкъдим итте.