news_header_top_970_100
news_header_bot_970_100

Татарстандагы 27 авыл җире районында 63 буа һәлакәт хәлендә дип исәпләнә

Яңа Чишмә, Чистай, Аксубай районнарындагы кайбер буаларның су агымын ябу-киметү җайланмалары төзек түгел

(Казан, 23 март, “Татар-информ”, Миләүшә Низаметдинова). Татарстан территориясендәге 27 авыл җире районында 63 буа һәлакәт хәлендә дип исәпләнә, аларның күпчелеге Буа, Биектау, Кукмара, Минзәлә, Мөслим, Яңа Чишмә, Чирмешән районнарына туры килә.

Бүген ТР Министрлар Кабинетында Татарстанда быелгы язгы ташу вазгыяте турындагы мәсьәләләр буенча үткәрелгән брифингта ТР буенча гражданнар оборонасы һәм гадәттән тыш хәлләр буенча министры урынбасары Николай Суржко шулай дип белдерде. ТР Экология һәм табигать ресурслары министрлыгыннан алынган мәгълүмат буенча, Яңа Чишмә районының Чертуш, Кызыл Октябрь, Колочи авылларындагы, Чистай районының Нарат Елга авылындагы, Аксубай районының Иске Илтерәк авылындагы буаларның су агымын ябу-киметү җайланмалары төзек түгел. Быелгы кышын республикада явым-төшемнәрнең уртача күрсәткечләрдән узып китүен исәпкә алганда, язын эриячәк кар һәм боз сулары гидротехник корылмалар аша чыкканда һәлакәтле вазгыять китереп чыгарга мөмкин, дип кисәтте министр урынбасары.

“Авыл районнарындагы муниципалитетлардагы Башкарма комитет җитәкчеләре, җирле үзидарә башлыклары белән булган очрашулардан күренгәнчә, алар табигатьне саклау законнарын бик йомшак белә, җитәкчеләрнең кайсылары гидротехник корылмаларның торышына мониторинг үткәрү, буаларны кышка һәм язгы ташуга әзерләүне бөтенләй белми. Муниципаль районнарда андый корылмаларның техник торышы һәм кулланганда куркынычсызлыгы өчен җаваплы вазифаи затлар билгеләнмәгән, җирле бюджетларында да язгы ташуны үткәреп җибәрү эшләренә, су хуҗалыгы системалары һәм корылмаларына мониторинг ясау, гадәттән тыш хәл килеп чыккан очракларга матди һәм финанс чыгымнар каралмаган”, - диде Н.Суржко.

news_right_column_1_240_400
news_right_column_2_240_400
Медиаметрикс
news_bot_970_100