Латвиянең «Идел» татар җәмгыяте Сабан туена әзерләнә

(Казан, 31 май, «Татар-информ», Фоат Уразаев). Латвиянең «Идел» татар җәмгыяте 12 июнь көнне Рига каласының Югла күле буенда Сабан туе үткәрергә җыена. Биредә татар халкының милли бәйрәме инде 2002 елдан бирле үткәрелә. Быелгы Сабан туе исә Казанның 1000 еллыгына багышлана. «Идел» татар җәмгыяте әгъзалары белдерүенчә, оешманың быел уздырыла торган барлык мәдәни чаралары да татар мәркәзенең олуг юбилеена багышлап үткәрелә.

Югла күле буенда үткәрелә торган Сабан туенда, узган елдан башлап, татарлар гына түгел, ә республиканың башка милли-мәдәни җәмгыятьләре вәкилләре дә бик теләп катнаша. Шуңа күрә халкыбызның милли бәйрәме биредә инде, чын мәгънәсендә, халыклар дуслыгы бәйрәменә әверелеп бара. Шуның белән бергә, ул һәр елда да татар халкының милли традицияләренә туры китереп үткәрелә.