Димитровградның «Сүнмәс йолдызлар» татар җыры ансамбле 25 еллык юбилеен билгеләп үтте

Ансамбль артистларына «Татар халкының милли үзенчәлеген саклау» ТР дәүләт программасы ярдәме белән тектерелгән милли киемнәр бүләк ителде.

(Казан, 30 март, «Татар-информ»). 28 март көнне Ульяновск өлкәсе Димитровград шәһәренең «Сүнмәс йолдызлар» татар җыры ансамбле 25 еллык юбилеен билгеләп үтте. Юбилей концерты «Восход» мәдәният һәм ял үзәгендә узды.

Чирек гасыр эшләүче коллективны котларга Бөтендөнья татар когрессы хезмәткәре Булат Ибраһимов, Димитровград шәһәренең Мәдәният идарәсе җитәкчесе Ирина Ширяева, Ульяновск өлкәсенең татар милли-мәдәни автономиясе рәисе Рәмис Сафин һ.б. мәртәбәле кунаклар җыелган иде, дип яза Бөтендөнья татар конгрессы.

Димитровградның татар милли-мәдәни автономиясе җитәкчесе Фәнис Җәббаров «Сүнмәс йолдызлар» ансамбле 1996 елдан бирле шәһәр һәм өлкәдәге тамашачыларны татар җырлары белән сөендерүе, төрле елларда федераль, өлкә һәм шәһәр Сабантуйларында да чыгыш ясауларын, Ульян өлкәсендә генә түгел, Татарстан һәм Россиянең башка регионнарында узган милли бәйрәмнәрнең дә йөзек кашы булып торуын ассызыклап узды.

Булат Ибраһимов ТР Премьер-министры урынбасары, Бөтендөнья татар конгрессының Милли шура рәисе Васил Шәйхразыевның сәламләү сүзен җиткерде һәм артистларга Татар конгрессының Рәхмәт хатлары һәм истәлекле бүләкләрен тапшырды.

Төп бүләк «Татар халкының милли үзенчәлеген саклау» ТР дәүләт программасы ярдәме белән тектерелгән милли киемнәр булды. Үзләрнең 25 еллык юбилей концертында ансамбль артистлары шушы милли киемнәр белән чыгыш ясадылар. Фәнис Җәббаров Татарстан хөкүмәтенә, Милли Шура рәисе Васил Шәйхразыевка коллективка бүләк ителгән милли киемнәр өчен рәхмәтләрен әйтте.

  • «Сүнмәс йолдызлар» ансамблен озак еллар Фәния Халиуллова җитәкләде, аның вафатыннан соң, 2019 елдан башлап коллективны Миләүшә Халитова җитәкли.