Казанда сигезенче тапкыр “Татар балалар лидеры мәктәбе” узачак

2010 елда башланган әлеге проект быел 2-8 ноябрь көннәрендә эшләячәк

(Казан, 27 октябрь, “Татар-информ”, Чулпан Шакирова). Казанда 2-8 ноябрь көннәрендә “Татар балалар лидеры мәктәбе” узачак. Аны Татарстан Республикасы Яшьләр эшләре һәм спорт министрлыгы, Татар федераль милли-мәдәни автономиясе, “Идел” яшьләр үзәге оештыра. Бу хакта бүген “Татар-информ” уздырган матбугат очрашуында билгеле булды.

“Әлеге проектка 2010 елда старт бирелде. Мин бу вакытта “Идел” яшьләр үзәгенең җитәкчесе вазыйфасын башкара идем, – ди Федераль татар милли-мәдәни мохтариятенең аппарат җитәкчесе Миләүшә Шәрәпова.

Чараның максатлары: яшьләр оешмаларында һәм берләшмәләрендәге актив татар балаларын барлау, төбәкләрдәге актив татар балаларын тарту, татарлар күпләп яши торган төбәкләрдә татар балалары белән эшләү өчен аерым үзәкләштерелгән тармак булдыру”.

“Татар лидерлар мәктәбе”ндә Татарстан балаларыннан тыш, Россия Федерациясенең төрле төбәкләрендә һәм чит илләрдә яшәүче, иҗтимагый, мәдәни тормышта актив кайнаучы, 60 укучы катнашачак. Шулай ук монда “Милләтебез хәзинәләре” профильле лагеренда актив, лидер булып танылган балаларның килүе дә көтелә.