Төркия студенты Окан Гүләр: Татарстанга татар телен өйрәнергә килдем

"Башта татарларның бер-берсе белән рус телендә аралашуына аптырап калдым", – ди ул.
(Казан, 27 сентябрь, “Татар-информ”, Алмаз Шиһабетдинов). "Татарстанга татар телен өйрәнергә килдем”, - дип сөйләде “Татар-информ” хәбәрчесенә КФУның Филология һәм мәдәниятара багланышлар институтының 1 курс магистратура студенты Окан Гүләр.“Татар телен Истанбул шәһәрендә университетта өйрәнә башладым. Анда укыган вакытта татар телен тирәнтен үзләштерергә 1 айлык программа белән Яр Чаллы шәһәренә килдем. Кире университетка кайткач, татар телен “Ана теле” проекты аша үзләштерүне дәвам иттем”, - дип сөйләде студент.“Казанда татар телендә сөйләшергә кеше күп дип әйтеп була, әмма башта ул кешенең татар булуын белергә кирәк. Мин башта аптырап калган идем: кешеләр төркем белән булганда татарча, ә инде икәү генә калганда, рус телендә сөйләшә. Кибетләрдә дә татар исемле сатучыларның кайберләре татарча эндәшүгә рус телендә җавап кайтара. Тик шулай да мин Казанда татар теле белән генә яшәп булмаганын аңлыйм”, - диде ул.Окан Гүләр татар теленең халыкара аралашу теле булуын әйтте.“Минемчә, төрки халыклар өчен татар теле авыр тел түгел. Татар телен өйрәнсәң, барлык төрки милләтләр белән дә аралашып булачак. Мәсәлән, мин татар телен өйрәнгәнче казах телен бөтенләй аңлый алмый идем, ә хәзер казах дусларым белән бер-беребезне яхшы аңлыйбыз”, - дип сөйләде ул.“Мин Татарстанга килгәнче татарлар турында берни дә белми идем. Аларны казахларга охшата идем, әмма монда килгәч, аларның аерым халык икәнлеген аңладым. Миңа Татарстан бик тә ошый, шулай ук татарларны да бик нык яратам”, - диде Окан Гүләр.