Воткинскида кош теле пешерү буенча ярыш узган

Җиңүчеләр берничә номинациядә бүләкләнгән.
(Казан, 27 май, "Татар-информ"). Воткинск шәһәрендә кош теле пешерү буенча бәйге үткәрелде, дип хәбәр итә Удмуртиянең "Яңарыш" газетасы. 
 
Бәйрәмгә әйләнгән бәйгедә катнашучы хатын-кызлар “Тургай” ансамбленнән иде. Катнашучылар үзләре белән таныштырды, җырлады, Габдулла Тукай шигырьләрен, мәзәкләр сөйләде, кош телен пешерү серләре белән уртаклашып, әлеге татлы ризыкны тамашачыларга, жюрига иҗади яктан тәкъдим итте. 
 
Бәйге “Тургай” ансамбле җырчыларының, Ижау шәһәреннән “Шатлык” халык ансамбле җитәкчесе Фәния Гаделшинаның матур җырлары белән үрелеп барды.
 
Воткинск шәһәренең иң оста кош теле пешерү остасы булып Фәния Кожевникова танылды. “Милли рухлы хуҗабикә” номинациясенә — Фәридә Хөсәенова, “Алтын куллы хуҗабикә” номинациясенә — Гөлсимә Останова, “Шаян, булдыклы хуҗабикә” номинациясенә — Фәридә Хәбирова лаек булды.
 
Бәйгедә катнашучыларга, оештыручыларга Воткинск татарлары автономиясе, Удмуртия татарларының милли-мәдәни автономиясе, Удмуртиянең “Ак калфак” оешмасы, “Яңарыш” газетасы редакциясе исеменнән Рәхмәт хатлары, истәлекле бүләкләр тапшырылды.