Айдар Галимов яшьләрне спортка җәлеп итә

Башкортстанның Миякә районындагы Олы Кәркәле авылында мини футбол буенча район турниры үтте
(Уфа, 24 сентябрь, “Татар-информ”, Фәнис Фәтхуллин). Башкортстанның Миякә районындагы Олы Кәркәле авылында мини футбол буенча район турниры үтте.
Әлеге бәйгеләрне үткәрү тәкъдиме белән танылган җырчы, Башкортстанның атказанган, Татарстанның халык артисты Айдар Галимов һәм Олы Кәркәле авылы мәктәбенең физкультура укытучысы Радик Әмиров чыккан иде. Шушы зур эшне башкаруның матди ягын авыл, район хакимиятләре, шулай ук Стәрлетамак физкультура академиясе һәм байтак иганәчеләр күтәрде.
Айдар Галимов призларына яшүсмер малайлар арасында мини футбол буенча район турниры, алдан көтелгәнчә үк, бик киеренке һәм мавыктыргыч үтте. Миякәбаш, Өршәк, Олы Кәркәле, Өязебаш, Өршәкбаш-Карамалы, Новый мир авыллары мәктәпләре укучылары – барлыгы 6 команда катнашты бу ярышларда.
Һәр яшь спортчыга Айдар Галимов үзенең җырлары язылган кассеталар, компакт-тәлинкәләр, календарь, значокалар, футбол хакында китаплар бүләк итте.
Бәйгеләр тәмамлануга, җиңүчеләрне дә зур бүләкләр көтә иде. Беренче урынны яулаган Новый мир авылы укучылары телевизор һәм кубок белән бүләкләнде. Икенче урынга күтәрелгән Өязебаш спортчылары музыкаль үзәккә ия булды. Ә өченче урынны алган Миякәбаш мәктәбе командасына DVD-уйнаткыч тапшырылды.
Район турнирына Уфадан һәм Миякәдән килгән иганәчеләр дә яшь спортчыларны үзләренең бүләкләре белән сөендерде.