Истанбул татарлары “Татарча диктант”ны “дүртле” һәм “бишле” билгеләренә язган

Диктантны язучылар арасында азәрбайҗан, украин һәм төрек милләте кешеләре дә катнашкан.

(Казан, 19 октябрь, “Татар-информ”, Зилә Мөбәрәкшина). Истанбул университетының әдәбият факультетында узган “Татарча диктант” акциясендә катнашучылар диктантны “бишле” һәм “дүртле” билгеләренә язган. Бу хакта Төркия яшьләре бүлеге вәкиле Айгөл Галиуллина хәбәр итте.

“Ике графикада яздылар: латин һәм кирилл. Күбесе кирилл әлифбасын белми. Диктант язарга азәрбайҗан, украин һәм төрек милләте кешеләре дә килде. Гомумән, бездә “дүртле” һәм “бишле”гә генә укучылар килгән икән, күбесе “бишле” билгесен алды. Егерме яшьтән алып, алтмыш яшькә кадәр утыздан артык кеше катнашты”, - диде ул.

Айгөл Галиуллина сүзләренчә, диктантны язучылар арасында текст бераз авырлык тудырган. “Кешеләр кайбер җөмләләрне авырлык белән язган. Әмма һәммәбезгә дә диктант язу ошады”, - ди ул.

Диктантта Газиз Мөхәммәтшинның “Саумысыз, аккошлар!” әсәре укылган. Текстны Айгөл Галиуллина үзе укыган. “Диктант язганнан соң җыелышып, табын артында чәйләр эчтек. Текстларны шунда ук тикшердек, хаталарны күрсәттек. Фикерләр алыштык”, - дип сөйләде ул.