Свердловск өлкәсе Сабан туенда ат чабышында җиңүчегә байтал бирәчәкләр

Сабантуйда татар эстрадасы җырчылары да чыгыш ясаячак.

(Казан, 16 июль, “Татар-информ”). 20 июльдә, 11:00 сәгатьтә “Ак ат” ял клубында Свердловск өлкәсе Сабан туе узачак. Бу хакта Бөтендөнья татар конгрессы сайты хәбәр итә.

Традицион күңел ачулардан тыш, кунаклар арасында айфон, смартфоннар, ноутбук, планшет уйнатачаклар. Шулай ук бәйрәмдә җырчылар Ришат Төхвәтуллин, Хәмдүнә Тимергалиева, Фәрит Фәйзрахманов, Зәринә Хәсәншина, Альбина Йосыпова катнашачак.

Ат чабышында җиңгән җайдакка Герда кушаматлы байтал бүләк итәчәкләр. Көрәш батырына төп бүләк буларак, автомобиль тапшырылачак.