Черногориядә беренче тапкыр Сабан туе узган

Беренче Сабан туе Тиват шәһәре пляжында узган.
(Казан, 14 июль, "Татар-информ". Рәмис Латыйпов). Бүген Черногориядә беренче тапкыр Сабан туе узган. Милли бәйрәм Тиват шәһәре пляжында үткән. Бу хакта "Татар-информ"га Мөслим районы егете, хәзерге вакытта Черногориядә яшәүче Айдар Гәрәев хәбәр итте."Сабан туен Черногориядә яшәүче Казан егетләре Рушан Вәлиев һәм Илдар Закиров оештырды. Алып баручы - Уфадан Эльвира. Аэропорт артында пляжда узды. Башлап җибәргәндә 20ләп иде, азакка 50-60 кеше җыелды. Бик күңелле, бик җылы узды. Оештыручыларга рәхмәт", - диде ул.Айдар әйтүенчә, беренче булганлыктан, күп кеше җыю максат итеп куелмаган, ул татарларны җыю, таныштыру максатыннан уздырылган. Милли бәйрәмнәр җирле үзенчәлекләрне исәпкә алып уздырылган. Мәсәлән, капчык белән сугышу уены диңгездәге көймәдә уздырылган - кем җиңелә, шул суга егыла."Чын катык алып килгәннәр иде. Капчык киеп йөгергәндә мин футболка оттым. Пластмасса булса да, чүпмәк ваттык. Элеп куелган бүләкләрне кистеләр. Рәсмилек булмады. Бик җылы бәйрәм. Татар җырлары уйнап торды, җырладык, биедек", - дип сөйләде Айдар. Беренче уенда көрәш уздырылмаган. Айдар әйтүенчә, пляжда ял итүчеләр дә уеннар белән кызыксына башлаган. "Рушанның кызы җирле мәктәптә укый, ул тәрҗемә итте. Черногория халкы да бәйрәмгә кушылды. Башларын катыкка тыгып акча эзләделәр, уенчыкларны кистеләр", -дип сөйләде Айдар.Айдар Гәрәев фейсбукта туры эфир алып барган. "Беренче сабан туе өчен бик яхшы", - диде ул. Айдар 2010 елда Черногориядә фатир сатып алган, җәйләрен туристларга хезмәт итү белән шөгыльләнә.