Мәскәүнең татар халкы өчен әһәмияткә ия урыннары буйлап виртуаль экскурсия оештырыла

«Әлеге сәяхәттә билгесез фактлар, сенсацион ачышлар хакында сөйләячәкбез һәм тарихчы, радиода тапшырулар алып баручы Марат Сәфәров белән бергә башкаланың «татар тарихы» белән бәйле урыннарына сәфәр кылачакбыз», - дип искәртә оештыручылар.

(Казан, 9 апрель, «Татар-информ»). Мәскәү татарлары милли-мәдәни автономиясе башкаланың татар халкы өчен әһәмияткә ия тарихи урыннары буйлап эскурсияләрнең яңа форматын тәкъдим итә. Бу хакта Бөтендөнья татар конгрессы сайты яза.

«Безнең белән бергә Мәскәү буйлап гадәти булмаган виртуаль сәяхәткә чакырабыз. Әлеге сәяхәттә билгесез фактлар, сенсацион ачышлар хакында сөйләячәкбез һәм тарихчы, радиода тапшырулар алып баручы Марат Сәфәров белән бергә башкаланың «татар тарихы» белән бәйле урыннарына сәфәр кылачакбыз. Мәскәү татарлары милли-мәдәни автономиясенең социаль челтәрләрендә очрашабыз, безнең экскурсия автобусында урын һәркемгә җитәчәк!» - дип искәртә оештыручылар.