Камал театры “Мәдәни Универсиада”ны “Зәңгәр шәл” белән ачып җибәрә

Бу юлы легендар спектакль берьюлы дүрт телгә - рус, инглиз, француз һәи испан телләренә синхрон тәрҗемә белән тәэмин ителәчәк

(Казан, 8 июль, “Татар-информ”). 8-14 июльдә – XXVII Бөтендөнья җәйге Универсиаданың Мәдәни программасы кысаларында Г.Камал исемендәге Татар дәүләт Академия театры Казан кунакларына үзенең иң популяр 7 спектаклен тәкъдим итә.

Спектакльләр циклы бүген театрның “йөзек кашы” булган Кәрим Тинчуринның “Зәңгәр шәл”е белән ачыла. Бу юлы легендар спектакль берьюлы дүрт телгә - рус, инглиз, француз һәи испан телләренә синхрон тәрҗемә белән тәэмин ителәчәк. "Зәңгәр шәл" спектакле рус, инглиз, француз һәм испан, башка спектакльләр рус һәм инглиз телләренә тәрҗемә белән тәэмин ителә.

Әлеге спектакль татар театрының символына әверелде. Тамашачының аңа игътибары кимеми, ул 1962 елдан бирле татар театры сәхнәсеннән төшми. Әсәр әдәбият күзлегеннән бик үк көчле булмаса да, пьесага, яшерен шигъри шифр итеп, ир-ат һәм хатын-кыз милли идеалының мәңге яшь, мәңге гүзәл образлары, халыкның ирексөяр холкы, туган җиренә мәхәббәте салынган. Татар театры феноменын аңлар өчен, “Зәңгәр шәл”не карарга, аны вакыйгалар тезмәсе буларак кына түгел, ә куәтле эмоциональ агым итеп кабул итәргә кирәк, дип хәбәр итәләр театрдан.