Төркиядә «Япон җирендә төрки эзләр» китабы русчага тәрҗемә ителеп чыккан

Төркия галиме Али Мәртхан Дүндар тарафыннан язылган хезмәт XX гасырның беренче яртысында Кытай һәм Япониядә яшәгән татарлар тормышына багышланган.

(Казан, 3 октябрь, «Татар-информ», Зилә Мөбәрәкшина). Төркиянең «Gece Kitaplığı» нәшриятында Анкара университеты профессоры Али Мәртхан Дүндарның «Япон җирендә төрки эзләр» китабы чыккан. Хезмәтне рус теленә Зөлфия Шаһин тәрҗемә иткән. Бу хакта «Татар-информ» хәбәрчесенә филология фәннәре кандидаты, доцент Азат Ахунов сөйләде.

«Яңа китап — авторның Япония, Америка һәм Төркия архивларында күпьеллык эзләнүләре нәтиҗәсе. Аның бу китабы берничә ел элек Төркиядә төрек телендә басылып чыккан иде. Моңа кадәр, „Япон җирендә төрки эзләр“ япон телендә дә басылды», — дип аңлатты ул.

Азат Ахунов сүзләренчә, Али Мәртхан китапта күпсанлы сирәк документларның фотокүчермәләрен тәкъдим итә, шул исәптән, рус телендә дә. «Ерак Көнчыгышта татарларның тормышы турында төгәл һәм тулы мәгълүмәт бирелә. Китап 4 бүлектән тора. Алар Харбин, Коба, Нагои, Токиодагы татар мәчетләренә багышланган. Сүз бары тик мәчетләр турында гына бармый, мәчетләр тирәсендә яшәгән татарларның тормышы да ачык күрсәтелә», — ди ул.

«Анкара университеты профессоры Али Мәртхан Дүндар — Төркиядә танылган галим. Күп еллар дәвамында ул Ерак Көнчыгыштагы төрки-татар диаспорасын өйрәнә. Аның бу темага багышланган күп санлы мәкаләләре, фәнни китаплары бар. Али Мәртхан бәй япон телен камил белә, шуңа күрә, турыдан-туры беренчел чыганаклар белән эшли», — дип сөйләде Азат Ахунов.