Татарстан спортчысы Токиода Олимпиадада көмеш медаль алды

Ул 2020 елгы Олимпиадада медаль алган беренче Татарстан вәкиле булды.

(Казан, 28 июль, «Татар-информ», Сергей Гаврилов). Казанның «Синтез» клубы йөзүчесе, Бөгелмәдә туган 26 яшьлек спортчы Александр Красных Токиода Олимпия уеннарында көмеш медаль алды. Ул ир-атлар арасында 4×200 метрга ирекле стильдә йөзү эстафетасында катнашкан.

Спортчы 2020 елгы Олимпиадада медаль алган беренче Татарстан вәкиле булды.

Александр Красных эстафетада үзе катнашмады, старт алдыннан аны алыштырдылар. Мартин Малютин, Иван Гирев, Евгений Рылов һәм Михаил Довгалюктан торган Россия командасы финалда дистанцияне 7:01.81 секундта йөзеп узды.

Россия спортчылары бары тик Британия спортчыларына гына оттырды. Җиңүче команда 6:58.58 секунд нәтиҗә күрсәтеп, Европа рекордын яңартты.

«Синтез» клубы йөзүчесе Александр Красных беренчел йөзү эстафетасында катнашты һәм командага 2020 елгы Олимпия уеннарының финалына узарга ярдәм итте.