Казанда өстәл теннисы буенча бөтенроссия яшүсмерләр турниры старт ала

Уеннар берьюлы 20 теннис өстәлендә уза
(Казан, 22 октябрь, «Татар-информ»). Бүген Казанның “Ак Бүре” спорт комплексында “Казан ракетасы” өстәл теннисы буенча III бөтенроссия яшүсмерләр турниры старт ала.
Ярышларда бөтен илдән 350 спортчы катнаша. Уеннар берьюлы 20 теннис өстәлендә узачак. Казанның өч спорт мәктәбе үз осталыкларын күрсәтәчәк, алар - өстәл теннисы буенча Олимпия резервы балалар һәм яшүсмерләр спорт мәктәбе, “Смена” балалар һәм яшүсмерләр спорт мәктәбе, “Олимп” Олимпия резервы балалар һәм яшүсмерләр спорт мәктәбе, дип хәбәр итә шәһәр мэриясе матбугат хезмәте.
Турнирны ачу тантанасы иртәгә була.
Җиңүчеләр һәм призерларга Казанның башкарма комитетының физкультура һәм спорт комитеты медальләре, дипломнары һәм кыйммәтле бүләкләре тапшырачак.