"Манзара" премиясендә уйнатылган машина үз иясен тапты

Lada Granta автомобиле Балтач районы Арбор авылына кайтып китте.

(Казан, 19 гыйнвар, "Татар-информ", Энҗе Габдуллина).  "Манзара" спорт-музыкаль премиясендә тамашачылар арасында уйнатылган Lada Granta машинасы Балтач районына китте.

"Манзара" спорт-музыкаль премиясендә сатып алынган билетлар буенча уйнатылган машина Балтачтан Салават Әсхәдуллинга эләкте.

Машина отучыны җирәбә ярдәмендә ачыкладылар. Аны бу елны абсолют батыр калган Муса Галләмов билетлар салынган тартмадан очраклы рәвештә бер билетны тартып алып, билгеләде.

"Әле ышанмыйм. Бер могҗиза булды бу. Андый нәрсә уйламыйча, бернигә өметләнмичә, көрәш карарга дип килгән идем. Билетны да сайлап алмадым. Шулай туры килгән инде", - ди Салават.