Миңнеханов Татарстанда БДБ Уеннарын оештыру комитетын төзү турындагы указны имзалады

Казанда уеннарга әзерлек буенча комитет составына, ТР Президенты белән бергә, барлыгы 35 кеше керде.

(Казан, 15 май, «Татар-информ»). Татарстан Президенты Рөстәм Миңнеханов Казанда беренче БДБ илләре Уеннарына әзерлек һәм үткәрү буенча республика оештыру комитетын төзү турындагы указны имзалады. Шул хактагы документ Татарстанның рәсми порталында дөнья күргән.

Оештыру комитетының бурычы чаралар планын әзерләү, аның үтәлешенә анализ ясау һәм контрольдә тотуны тәэмин итү, шулай ук хакимият органнары һәм иҗтимагый берләшмәләрнең үзара бәйләнешен оештырудан гыйбарәт.

Оештыру комитетына барлыгы 35 кеше керде, аның рәисе – Рөстәм Миңнеханов үзе. ТР Президентыннан тыш, комитет составында ТР спорт министры Владимир Леонов, Казан мэры Илсур Метшин, Идел буе спорт академиясе ректоры Йосыф Якупов һ.б. бар.