Яшел Үзән спортчылары су асты спорты буенча Россия чемпионатында катнашты

Балалар яхшы нәтиҗәләр күрсәтте һәм иң шәп алтылыкка керде.

(Яшел Үзән, 13 ноябрь, «Татар-информ», «Яшел Үзән»). Яшел Үзән спортчылары Татарстанны су асты спорты буенча Россия чемпионатында лаеклы тәкъдим итте. Ярышлар Санкт-Петербургта «Невская волна» су спорт төрләре үзәгендә узды. Бу турыда район басмасы хәбәр итә.

Анда Россиянең 16 төбәгеннән 100 дән артык спортчы катнашты, алар арасында Россия, Европа һәм дөнья чемпионнары да бар.

Турнир дисциплинасына катнаш йөзү (300 метр), каршылыклар полосасы (100 метр), төнге дайвинг һәм йөк күтәрү кергән.

Татарстаннан Яшел Үзән яшүсмерләре Рамазан Шаһимәрдәнов (14 нче лицей), Ян Логашин (11нче мәктәп), Дарья Поликарпова (3 нче гимназия), Влад Михайлов (15нче мәктәп), Семен Слесарев (Яшел Үзән медицина училищесы) катнашты.

Балалар яхшы нәтиҗәләр күрсәтте һәм иң шәп алтылыкка керде. Рамазан Шаһимәрдәнов белән Ян Логашин спорт мастерына кандидат исемен расладылар һәм «каршылыклар полосасы» дайвингы дисциплинасында дүртенче урынны алды, Влад Михайлов «төнге дайвинг»та дүртенче урынга чыкты.