Бүген "Ак Барс" составында Канада һөҗүмчесе Роб Клинкхаммер бозга чыга

Казан хоккейчылары үз бозында "Спартак" командасы белән очраша.
(Казан, 12 сентябрь, “Татар-информ”, Фәрит Салихов). “Ак Барс” хоккей командасының Континенталь хоккей лигасы даими чемпионаты кысаларында Мәскәүнең “Спартак” хоккейчыларына каршы чыгачак составы билгеле булды. Казан командасы капкасын бүген Тимур Билялов саклый. Бу аның икенче матч рәттән уенга чыгуы. Ә һөҗүмчеләр рәтендә Канада хоккейчысы Роб Клинкхаммерны күрәчәкбез. Аның “Ак Барс” өчен тәүге тапкыр уйнавы. Бүген көндезге ачык күнегүләр вакытында Канада уенчысы Станислав Галиев һәм Владимир Ткачёв белән бер өчлектә шөгыльләнгән иде. “Спартак”ка каршы уенга да бергә чыгачаклар. “Клинкхаммер чыдамлы уенчы. Аны күплектә уйнаганда да, аз составта калганда да файдаланып булачак. Ул команданы көчәйтәчәк, – дигән иде көндез команданың баш тренеры Зиннәтулла Билалетдинов. – “Спартак”ка каршы уенга килгәндә, яхшы нәтиҗә көтәм”. Матч 19.30 сәгатьтә башлана.