"Ак Барс" хоккейчысы дөнья чемпионатында катнашачак

Сакчы Атте Охтамаа чемпионатта Финляндия җыелма командасы данын яклаячак.

(Казан, 2 май, "Татар-информ"). Финляндия хоккей җыелмасы данын дөнья чемпионатында Континенталь хоккей лигасында чыгыш ясаучы 10 хоккейчы яклаячак. Алар арасында “Ак Барс” сакчысы, 29 яшьлек Атте Охтамаа да бар. Бу хакта илнең хоккей федерациясе рәсми сайты хәбәр итә.

Быел дөнья чемпионаты 5-21 майда Франция белән Германиядә уза.

Сүз уңаеннан, Атте Охтамаа Европа хоккей турының соңгы этабы – Чехия хоккей уеннарында да чыгыш ясады. Ул анда 3 матчта катнашып, голга китергән 2 пас бирде, ә Финляндия җыелмасы икенче урын яулады.