Татарстанда изоляция чорында ялгызың гына ауга һәм балыкка йөрергә рөхсәт итәчәкләр

Үз-үзеңне изоляцияләү режимы Россия территориясендә санитар-эпидемиологик вазгыять тотрыклы төс алганчыга кадәр гамәлдә булачак.

(Казан, 30 март, «Татар-информ», Вероника Ваганова). Татарстанда изоляция чорында ялгызың гына ауга һәм балыкка йөрергә рөхсәт итәчәкләр. Үз-үзеңне изоляцияләү режимы Россия территориясендә санитар-эпидемиологик вазгыять тотрыклы төс алганчыга кадәр гамәлдә булачак. ТР транспорт һәм юл хуҗалыгы министры Ленар Сафин ТР Министрлар Кабинетында узган киңәшмәдә шул хакта хәбәр итте.

«Үзең генә ауга йөрергә ярый, ә зур компанияләр белән рөхсәт ителми. Бу балыкчыларга да кагыла», - диде ул.

Ау сезоны ачылу турында карар әлегә чыкмаган. Сафин сүзләренчә, карарга 11 яки 18 апрельдә имза куелачак.