Питрәчтә Татарстан халыклары Ассамблеясы Советының күчмә утырышы булды

Ассамблея әгъзаларының бер өлеше видеоконференция режимында катнашты.

(Питрәч, 29 октябрь, «Татар-информ», «Питрәч-информ», Ләйсән Мифтахова). Питрәчтә Татарстан халыклары Ассамблеясы Советының, милләтара һәм конфессияара мөнәсәбәтләр мәсьәләләре буенча ведомствоара эшче төркемнең күчмә утырышы узды.

Татарстан Халыклары ассамблеясе Советы Рәисе Фәрит Мөхәммәтшин билгеләп үткәнчә, чирек гасырдан артык актив эшчәнлек дәверендә Ассамблея Татарстан халыкларының күп милләтле хәрәкәтен берләштерү үзәгенә әверелде. Аның канаты астында 240лап милли-мәдәни берләшмә бар — 28 төбәк һәм 210 җирле берләшмә.

Күргәзмәдә Питрәч районы территориясендә яшәүче барлык милли мәдәниятләрнең төрлелеге күрсәтелде. Биредә әрмән, украин һәм таҗикларның традицион ашларын, татар, рус һәм керәшеннәрнең милли костюмнарын һәм башкаларны күрергә мөмкин иде. Пайгомиддин Кахоров милләте буенча таҗик, Питрәчтә яши. Ул күргәзмәдә пылауны ничек әзерләргә кирәклеге турында сөйләде.

«Без махсус дөге, мамык мае, нут, ак фасоль кулланабыз… Бу ашамлык безнең барлык бәйрәмнәрдә өстәлне бизи. Без тарихи ватаныбыздан ерак яшәсәк тә, барлык традицияләрне дә хөрмәт итәбез һәм бәйрәмнәребезне билгеләп үтәбез», — диде Пайгомиддин Кахоров.

Утырышта Ассамблея эшенә элгәре нәтиҗәләр ясалды һәм аның яңа вәкиллекләренә җитәкчеләр билгеләнде, шул исәптән Питрәч районында. Эш барлык санитар-эпидемиологик нормаларны үтәп алып барылды. Ассамблея әгъзаларының бер өлеше видеоконференция режимында катнашты.