Россия Президентының Яңа ел ялына планы турында матбугат сәркатибе Дмитрий Песков сөйләгән

Матбугат сәркатибе Россия Президентының бәйрәм табынында нинди ризыклар булачак, дигән сорауга җавап бирә алмаган.
(Казан, 28 декабрь, "Татар-информ"). Россия Президенты Владимир Путин Яңа ел бәйрәмнәрендә тулы тугыз көнне дә ял итмәячәк, ничек кенә булмасын, ул эшләячәк, буш вакыт булганда, бәлки, спорт белән шөгыльләнәчәк, – дип журналистларга сөйләде ил башының матбугат сәркатибе Дмитрий Песков, дип яза “Интерфакс”. Матбугат сәркатибе Россия Президентының бәйрәм табынында нинди ризыклар булачак, дигән сорауга җавап бирә алмаган, бары тик: “Владимир Путин ашауга килгәндә гади кеше, сәламәт ризыкка өстенлек бирә”, – дип искәрткән. Калганы турында, Дмитрий Песков: “Бу – Президентның шәхси тормышы, анда кысылырга кирәкмидер”, – дигән.