Чирмешән районының Лашман авылында кавышкан яшь гаиләгә юбилей медале дә тапшырдылар

Яшьләрне 60 ел элек гаилә корган пар да котлаган.

(Чирмешән, 28 февраль, «Татар-информ», «Безнең Чирмешән», Гөлсирә Шәрифуллина). Чирмешән районының Лашман авылында Садыйковлар гаиләсе өчен әлеге көн икеләтә истәлекле булды. Яшь гаиләгә никах теркәү турында таныклык белән бергә ТАССРның 100 еллыгы уңаеннан юбилей медале дә тапшырдылар. Бу турыда район басмасы хәбәр итә.

«Олыларны хөрмәт итеп, алар белән киңәшләшеп, туганнарыгыз, дусларыгыз белән бер-берегезгә булышып, бер-берегезне күз карашыннан аңлап гомер итегез!» — диде тантанада катнашкан муниципаль район башкарма комитеты җитәкчесе урынбасары Рәмзия Долгополова.

Бәхетле парларның шатлыкларын уртаклашырга байтак кеше: әти-әниләре, туганнары, дуслары килде. Кунаклар арасында Түбән Кәминкә авылында яшәүче, әле күптән түгел генә бриллиант туйларын билгеләп үткән Искәндәр һәм Гөлсинә Мостафиннар да бар иде, алар да яшьләргә үз теләкләрен ирештерделәр. Мостафиннар 60 ел элек 14 февральдә гаилә корган.

Яшьләрне кавышу көне белән котларга, ТАССРның 100 еллыгын символлаштырып, 60 һәм 25 ел бергә гомер иткән авылдашларын да чакырганнар.

Яшь парны һәм чараның кунакларын Түбән Камадагы бер оешмада профсоюз комитетын җитәкләүче Фәгыйль Гатиятов та котлады һәм аларга бүләкләр тапшырды