Равил Моратов: “Без егетләрне милли билгеләр буенча бүлеп карамыйбыз”

Татарстаннан армиягә чакырылучылар тәртип булмаган җирдә хезмәт итмәячәкләр
(Казан, 26 декабрь, "Татар-информ", Эмма Ситдыйкова). Татарстаннан армиягә чакырылучылар тәртип булмаган җирдә хезмәт итмәячәкләр. Бүген ТР чакырылыш комиссиясе утырышында ТР Премьер-министрының беренче урынбасары, чакырылыш комиссиясе рәисе урынбасары Равил Моратов әнә шулай дип белдерде.
Шулай ук беренче вице-премьер: “Без яшьләрне милли билгеләр буенча бүлмибез”, - дип ассызыклады.
Гаммәви мәгълүмат чараларында милли билгеләр буенча хәрби бүлекләр булдырырга омтылу турында дөнья күргән басмаларны шәрехләп, Равил Моратов: “Без шулкадәр интернациональ ки, кемнең нинди милләттән булуына карамыйбыз. Без егетләрнең ничек хезмәт итүләрен карыйбыз, кирәк булганда яклыйбыз, әгәр безнең яшьләр үзләрен уңайсыз хис итәләр, тиешле шартлар тудырылмаган, дедовщина хөкем сөрә икән тиз арада реакция белдерергә тырышабыз. Бу очракта егетләрне башка хәрби бүлекләргә хезмәт итәргә күчерү өчен чаралар күрәбез. Безнең егетләр тәртип булмаган җирдә хезмәт итмәячәкләр. Без яшьләрне милли билгеләр буенча бүлмибез”.