Татарстанда юлларда куркыныч урыннарда иминлекне арттыру буенча эшләр үткәрелгән

Узган елда юл һәлакәтләре еш була торган 101 урын теркәлгән.

(Казан, 25 ноябрь, «Татар-информ», Гөлнар Гарифуллина). Татарстанда аварияләр күп була торган урыннарда юл хәрәкәте куркынычсызлыгын арттыру буенча эшләр үткәрелгән. Бу хакта Татарстанның транспорт һәм юл хуҗалыгы министры Фәрит Хәнифов сөйләде.

Узган елда юл һәлакәтләре еш була торган 101 урын теркәлгән, шуларның җидесе — федераль юлларда, бишесе — төбәк әһәмиятендәге һәм 89ы — шәһәр-район юлларында. Авыр тән җәрәхәтләренә китергән юл фаҗигаләре килеп чыккан 186 куркыныч урын билгеле. 

Мондый участокларда быел тиешле эш башкарылды. 35 районда юл хәрәкәте иминлеген арттыру өчен, 129 ясалма тигезсезлек булдырылган. 94 км юлда ясалма яктырту башкарылган, 13 км дан артык барьер киртәләре, өч светофор, 11 км тротуар, 49 тукталыш павильоны, 32 фото һәм видеофиксация комплексы куелган. 

«Болар барысы да юл хәрәкәте куркынысызлыгы хакына эшләячәк», — диде Фәрит Хәнифов.