Азнакай әниләрен бәхетле бала тәрбияләү серенә өйрәттеләр
Азнакайда «Сандугач» балалар бакчасы базасындагы «Компас» үзәгендә семинар узды.
(Азнакай, 25 сентябрь, «Татар-информ», «Маяк», Резидә Шәрипова). Азнакайда «Сандугач» балалар бакчасы базасындагы «Компас» үзәгендә семинар узды. Анда әти-әниләр белән ничек итеп бәхетле бала тәрбияләү турында әңгәмә дә үткәрделәр. Бу турыда район басмасы хәбәр итә.
Ул «Мәктәпкәчә яшьтәге баласы булган әти-әниләргә психологик-педагогик, диагностик һәм консультатив ярдәм күрсәтүне оештыру формалары» дигән темага багышланган иде.
Аны консультаця үзәге белгечләре Казан шәһәренең «Егоза» мәгариф үзәге белән берлектә оештырдылар. Семинарда Азнакай, Әлмәт, Актаныш районнарыннан 41 педагог катнашты.
Педагогик фәннәр кандидаты, Татарстан иҗтимагый палатасы әгъзасы, «Егоза» үзәге директоры Наталья Реснянская һәм балалар нейропсихологы, югары квалификацияле педагог-психолог Әлфия Махатадзе чыгышлары файдалы һәм кызыклы булды.
Шулай ук Әлфия Махатадзе әти-әниләр белән ничек итеп бәхетле бала тәрбияләү серенә дә өйрәтте.