Фирдүс Тямаев: Тәнкыйтьнең чамасы булырга тиеш

Җырчы фикеренчә, җырның сүзләренә бәя бирә торган урын юк.

(Казан, 25 август, "Татар-информ", Эльвира Шакирова). Эстрадага карата тәнкыйть һәрвакытта да кирәк, ләкин аның чамасы булырга тиеш. Җырчы Фирдүс Тямаев "Татар-информ" мәгълүмат агентлыгындагы матбугат конференциясендә шул хакта белдерде.

“Без тәнкыйть белән үсәргә тиеш, ләкин аның чамасы булырга тиеш, дип уйлыйм. Җырга бәяне халык бирә. Бүген җырның сүзләрен тикшерә торган урын да, худсовет та, продюсерлык үзәкләре дә юк. Җырны "өч тиенлек", "биш тиенлек" дип, каян чыгып әйтергә кирәк?” – диде ул.

Җырчы журналистлар тарафыннан артистларга карата хурлау сүзләрен әйтү очраклары булуын да телгә алып, язар алдыннан кемнедер кимсетмиме икән, дип уйланырга чакырды. “Бервакыт “Татар җыры”ннан соң: "Фирдүс Тямаев исерек кебек чыкты", "Эльмира Сөләйманова сыер савучы кебек киенгән", дип язып чыктылар. Ә сыер савучыга ни булган? Минем әнием – сыер савучы. Ул башка кешедән кимме? Минемчә, кара пиарны кулланмаска кирәк”, – ди җырчы.