Путин хәрби хезмәткә чакыру перспективалары турында сөйләде

Югары белемле яшь белгечләргә технопарк оештырылачак. Биредә белем һәм тәҗрибәләрне кулланып чып-чын хәрби хезмәт узарга мөмкин булачак.

(Казан, 24 октябрь, "Татар-информ"). Россия Президенты Владимир Путин WorldSkills Russia милли җыелма командасы әгъзалары белән очрашу барышында армиядә хезмәт итү мәсьәләсенә тукталды.

“Российская газета” язганча, бер әңгәмәдәш киләсе чемпионатта катнашуда армиягә чакыру комачауларга мөмкинлеген белдергән. Яшьләр яңа буын чемпионнары күнекмәләр белән бергә ватан алдындагы бурычларын да үти торган альтернатив хезмәт булдыруны сораганнар.

Президент сүзләренчә, шартлыча әйткәндә, югары белемле яшь белгечләргә технопарк оештырылачак. Биредә белем һәм тәҗрибәләрне кулланып альтернатив түгел, ә чып-чын хәрби хезмәт узарга мөмкин булачак.

Чакырылыш буенча хезмәттән ил акрынлап чигенә, дип белдерә Президент. Бу мәсьәлә әлегә бюджет чикләүләре белән бәйле акрынрак чишелә.