ТР торак-коммуналь хуҗалык комплексын реформалау һәм яңарту программасына үзгәрешләр керә

Әлеге закон проекты гражданнарга сыйфатлы торак-коммуналь хезмәтләргә булган хокукын тормышка ашыруга ярдәм итү максатында эшләнгән
(Казан, 24 сентябрь, “Татар-информ”, Римма Гатина). Бүген ТР парламенты депутатлары сессиядә “2004-2010 елларга Татарстан Республикасы торак-коммуналь хуҗалык комплексын реформалаштыру һәм яңарту программасын раслау турында” ТР Законына үзгәрешләр кертү турында” ТР законы проектын беренче укылышта кабул итте.

Әлеге закон проекты ТР Министрлар Кабинеты тарафыннан, гражданнарга сыйфатлы торак-коммуналь хезмәтләргә булган хокукын тормышка ашыруга ярдәм итү һәм РФ Торак кодексы белән тәңгәлләштерү максатында эшләнгән. РФ Торак кодексындагы үзгәрешләр белән бәйле рәвештә республиканың гамәлдәге законына да кайбер төзәтмәләр кертелә.

ТР Төзелеш, архитектура һәм торак-коммуналь хуҗалык министрының беренче урынбасары Раузил Хаҗиев сүзләренчә, 2004-2010 елларга Татарстан Республикасы торак-коммуналь хуҗалык комплексын реформалаштыру һәм яңарту программасы булмаса, республикага федераль үзәктән капиталь ремонт өчен акча алу авыр булыр иде. Татарстан Россиянең башка төбәкләре арасында капиталь ремонт өчен зур күләмдә акча алучыларның берсе булып тора.