Азнакайда диңгезчеләр хөрмәтенә монумент ачылды

Монументны ачу тантанасында күрше-тирә районнардан, Башкортстан республикасыннан да диңгез флотында хезмәт иткән ир-егетләр җыелды.

(Азнакай, 24 июль, «Татар-информ», «Маяк», Лиза Нурлыева). Хәрби-диңгез флоты көне алдыннан Азнакайда диңгезчеләр хөрмәтенә монумент ачылды. Ул шәһәрнең Җиңү паркында урнашкан.

Монументны ачу тантанасында күрше-тирә районнардан, Башкортстан республикасыннан да диңгез флотында хезмәт иткән ир-егетләр җыелды.

Истәлекле бәйрәмне ачып, район башлыгы Марсель Шәйдуллин җитәкчелек һәм барлык азнакайлылар исеменнән тәбрикләү сүзләрен, изге теләкләрен җиткерде. Хәрби комиссар Рәдиф Камалиев диңгезчеләрнең Ватан сугышында, хәрби вакыйгаларда кылган батырлыкларын сөйләп узды.

Кунаклар да сүз алып, Азнакай диңгезче-ветераннарының киләчәктә дә шулай җитәкчелекнең игътибарында булып, хәрби дуслыкны саклап яшәүләрен теләделәр.