Түбән Каманың 55 еллыгында шәһәрдә диңгезчеләр музее ачылды

Музейда Россия су асты флотын булдыру һәм үстерү чорларын чагылдырган уникаль экспонатлар тәкъдим ителгән.

(Казан, 24 март, «Татар-информ»). Түбән Камада «Шәһәр электр транспорты» предприятиесе базасында диңгезчеләргә багышланган музей ачылды. Ул истәлекле вакыйгалар — Түбән Каманың 55 еллыгы һәм Россия су асты флотының 115 еллыгында оештырылды. Бу турыда Түбән Кама муниципаль районы рәсми сайтында хәбәр ителә.

«Түбән Кама диңгез һәм океан акваторияләреннән ерак булса да, безнең шәһәрдә су асты диңгезчеләре дә — Ватанга хезмәт бурычын үтәп, субмариналарда хезмәт итүчеләр дә яши», — дип язган инстаграмда Түбән Кама мэры урынбасары Марина Камелина.

Музей Түбән Каманың мактаулы гражданины, «Шәһәр электр транспорты» предприятиесе генераль директоры Рафаил Хәбибуллин инициативасы белән оештырылган. Ул үзе дә экспонатлар туплаган.

«Шәһәрдә су асты ветераннары — 357 кеше, ә хәрби комиссариатта 154 диңгезче исәптә тора. Барлык гаскәрләр — диңгез пехотасы, су асты көймәләре, су асты көймәләре, диңгез авиациясе гаскәрләрен исәпләгәндә, бездә диңгезчеләр 1 887 кеше, безнең бай шәһәр», — диде Рафаил Хәбибуллин.

Музейда Россия су асты флотын булдыру һәм үстерү чорларын чагылдырган уникаль экспонатлар тәкъдим ителгән. Бу — Татарстанда икенче музей, беренчесе берничә ел элек Казанда, 78нче мәктәптә ачылган.