Сәхифәләр
«Татар-информ» мәгълүмат агентлыгы баш редакторы
Ринат Билалов
420066, Татарстан Республикасы, Казан, Декабристлар ур., 2нче йорт.
«ТАТМЕДИА» акционерлык җәмгыяте
«Татар-информ» мәгълүмат агентлыгы татар редакциясе
Баш редактор
Рәмис Латыйпов
Баш редактор урынбасары
Ләйсән Хафизова
Рөстәм Миңнеханов: Җәмәгать транспорты эше сыйфатын яхшырту турында уйларга кирәк
Ул кадрлар сайлау, транспортның техник торышы да контрольдә булырга тиешлеген әйтте.
(Казан, 24 февраль, «Татар-информ», Гөлнар Гарифуллина). Татарстан Президенты Рөстәм Миңнеханов җәмәгать транспорты эше сыйфатын яхшырту турында уйларга кушты.
Казан шәһәр думасы сессиясендә ул җәмәгать транспорты турында бүген сүз еш чыгып торуын искәртте.
«Чаллыда да, Әлмәттә дә, Түбән Камада да проблемалар бар. Хәрәкәт составына да игътибар кирәк: каядыр янып киткән, каядыр йөртүче хата ясаган. Кадрлар сайлау да, транспортның техник торышы да безнең контрольдә булырга тиеш», — диде Рөстәм Миңнеханов.
Президент җәмәгать транспортына ихтыяҗ елдан-ел зуррак булачагын искәртте. «2013 елда транспорт хәрәкәте өчен уңайлы юллар төзелгәч, бернинди бөкеләр юк иде. Бу безгә биш елга җитте», — диде.
Рөстәм Миңнеханов Казан кызыктыра торган шәһәр булуын, читтән кеше күп килүен билгеләп узды. «Һәр студент машина алып йөри башлады. Сингапурда машина алганчы башта машина алырга хокуклар сатып алырга кирәк, аннары машина сатып аласың. Бездә бу мәсьәләләрдә ниндидер тәртип булмау үз нәтиҗәләрен бирә», — диде.
Президент Казанга эшкә шәһәр яны районнарыннан да килүчеләр байтак булуын искәртте. Аның сүзләренчә, урыннарда социаль инфраструктура, эш урыннары булса, андый проблема булмас иде. «Шәһәр яны агломерацияләрен үстерү мәсьәләләренә игътибар белән карарга кирәк», — дип белдерде.
Кызыклы яңалыкларны күзәтеп бару өчен Телеграм-каналга язылыгыз